logo_aresprensa_notas
FINALIZA LA "FIESTA HERMOSA" DE ZAMBOANGA

Publicado el 31 de octubre de 2010 / 19.35, hora de Bogotá D.C., República de Colombia // 08.35 del 01 de noviembre de 2010 en Zamboanga, República de Filipinas // Versión original escrita en Lengua Chavacana de la ciudad de Zamboanga o español filipino. 

La Alcaldía de la Ciudad Filipina la Impulsó en 2010 Bajo el Lema: "...¡Adelante Zamboanga!" 

FINALIZA LA "FIESTA HERMOSA" DE ZAMBOANGA 

Es la tradición festiva más fuerte y de mayor arraigo popular en Zamboanga. Nació con la presencia española de rostro mexicano en el Extremo Oriente en el siglo XVII y, por eso mismo, con la llegada del cristianismo a la isla de Mindanao. Zamboanga fue el epicentro de ese foco cultural que ha pervivido con la lengua chavacana, el español tal como se habla en el sur de Filipinas. Es la Fiesta del Pilar o "Fiesta Hermosa", en la cadencia de habla de los zamboangueños, quienes no renuncian al arraigo de su matriz cultural latina y, por el contrario, lo afirman con expresiones de patrimonio intangible como éste que concluye al finalizar octubre, después de transitar un mes y como introducción a las también extensas celebraciones de la Navidad filipina.

 

Escribe: María Frencie CARREÓN 

español

 

 

 

El celebracion del Fiesta Hermosa cada año es un tradicion para con el maga residentes y tambien maga ciudadanos de antes de Zamboanga, que es conocido como Ciudad Latina del Asia. "Celebracion en grande...Adelante, Zamboanga" el tema del Fiesta Hermosa 2010, el mismo festivo unico que ta demonstra el patrimonio multicultural de la bella ciudad latina."Ya principia el festival con un celebracion en grande," habla el Senor Alcalde esforzado del Zamboanga, Celso Lobregat y Lorenzo. 

Para con el juvenil presidente del Voice of Mindanao [un asociacion del los jovenes], Frances Ramos, debe tambien en grande el celebracion porque el Ciudad de Zamboanga ahora el modelo del ciudades en pais segun con el realizacion ejemplar en gobernancia, transparencia, y el administracion del presente Alcalde, Don Celso Lobregat incluido el maga situaciones de crisis, projectos de infrastructura en educacion del jovenes de Zamboanga, y otras cosas esfuerzos para con el desarollo del ciudad. 

Durante del primer dia del Octubre, miles de residentes y turistas ya participa en Pink October Walk, un caminada como tan conmemora con el Breast Cancer Awareness Month-un ocasion encabezado el Departamento del Salud. La Señora Congresista Maria Isabelle Climaco ya encabezado el Caminada en Zamboanga, con la suporta del Oficina de Salud del Dr. Rodelin Agbulos. 

El Job Fair (Feria de Trabajo) na Nuevo Plaza Pilar ya hace del 1-2 Octubre este año. Ya organiza con este el Public Employment Service Office (PESO) del City Social Welfare and Development Office (CSWDO) junto con el Department of Labor and Employment (DOLE), Philippine Overseas Employment Agency (POEA) y el ABS-CBN Regional Television Network-Zamboanga, para avanza el compromiso del gobierno local como dale trabajo con aquellos parados o sin empleo. El suma total del aplicantes ya alcanza 1,456, pero 477 el ya qualifica-102 para con el empleo de ultramar, y 375 para con el maga trabajos locales. 

COSECHAS DE ZAMBOANGA Y "PESCA KITA!" 

Ya principia el ika-siete (septimo) Cosechas de Zamboanga en 2 Octubre, na Plaza Pershing. El Cosechas es muy significativo que este el un oportunidad por el maga granjeros y pescadores para exponer el maga productos locales diferentes con calidad bueno. Ya habla el Alcalde Lobregat que tiene tambien ya organiza el gobierno local como consultaciones y formaciones en agricultura y tecnologia moderno. El Cosechas termina este Viernes, 15 Octubre.

Mas de ciento pescadores el ya participa con el "Pesca Kita"-un competicion del pescadores en Zamboanga quien ya llega tan temprano como alas cuatro y alas cinco de madrugada na Paseo del Mar cuando 2 Octubre. El Paseo del Mar ya abri para con el publico del año pasado pero ya queda este atracion famoso en turismo local. 

 

Fuerte del Pilar, construido en Zamboanga por nativos, mexicanos y españoles en el siglo XVII 

 

Durante el primero semana del Octubre, todo noche vivo el Paseo del Mar y muy lleno con el maga ciudadanos y miles de visita quien ya veni na Zamboanga para seguir con el celebraccion en grande del Wow Zamboanga, el vercion local del Wow PhilippinesEste el programa anual del Oficina de Turismo Local, que tan reuni con los vivientes del 98 comunidades diferentes del todos distritos desde Licomo hasta Limpapa. Musica y baile el presentacion principal. 

"We always hope that there will be a lot of tourists coming in and a lot of Zamboangueños coming back home from abroad for the fiesta celebration," ya habla el Señor Alcalde Lobregat con el maga turista y visita, entrao ya el Zamboangueños quien permanente ya ta queda na otro paises. 

"AYUDAHAN SI TIENE CRISIS" 

Acabar con el demonstracion del capabilidad del militar y policia local na campo del Philippine Marines en Cabatangan del 6 Octubre, ya anuncia si Alcalde Lobregat enfrente con el representantes del organizaciones diferentes y instituciones del gobierno, y tamien con el maga miembro del prensa local, que es muy importante el coordinacion y ayudahan cuando tiene crisis ta pega con el Zamboanga. 

El demonstracion, que ya manda mirar tres situaciones de crisis, ya enseña con aquellos participantes en el Crisis Management Committee (CMC) y miembro del grupo de military, policia, de radio (D'Alert), de medico, del Bureau of Fire Protection y Zamboanga City Red Cross, y del prensa. 

"Also shown was the interoperability between all units," ya habla si Lobregat, quien tambien el tan presidi con el CMC. "It was also a show of cohesiveness and proper tasking and everybody did what they were supposed to do." Enfatico el Alcalde cuando ya anuncia le que estos situaciones de crisis no hay quien quiere hay sucede, pero es muy necesita preparar si por ejemplo, guinda otra vez el dificil problema con el Zamboanga. 

"Estos el situaciones que no hay canaton quien quiere quedar. No hay ni uno con vosotros quiere sucede el crisis [cuando ya reventa un bomba na aeropuerto internacional de Zamboanga]. Todos vosotros que tan reza nunca aquel situacion sucede otra vez. Pero si-ojala no-sucede, necesita talli kita todo," ya habla si Lobregat, quien hay tan servi su ika-tres termino como alcalde del primer ciudad del este parte del Filipinas sur. 

Pero ya manda le acorda con el todos que debe no olvida rezar con La Nuestra Señora Virgen del Pilar por proteccion y seguridad del ciudad Latina. Ya anuncia el Alcalde, "Everybody has rights, the media have rights, every single citizen has rights but with rights come responsibility. All your efforts to promote Zamboanga and to protect Zamboanga will go to waste by a single slanted headline and news item."  

SERVICO MEDICAL Y CANCIONES EN CHAVACANO 

27 veces ya ya hace el festival del canciones Chavacano, principiando con el termino del antes Alcalde, Doña Maria Clara Lobregat y Lorenzo, su madre del Alcalde de presente. Este año, ocho contestantes ya qualifica en el finale, cantando composiciones originales en Chavacano. Ganando del 7 Octubre el canciones titulado: 'Zamboanga, Zamboanga' de Casiano Bucoy; 'Zamboanga,Oi Tu Este' de Jaime Aslapal; 'Man Junto-junto' de Adie Arellano; 'Fiesta Pilar ' de Ervito Toribio; 'Hey, Miss' de Rogelio Batislaon; 'La Virgen del Pilarde Rene Ayo; 'E Tu Lang Mi Corazon' de Rashella Cerilo y Florecio Ave. 

Libre servicio medical el ya dale el Oficina de Salud del Ciudad de Zamboanga, junto con el Oficina del Alcalde. "Este el un demonstracion del compromiso del gobierno local para con el salud de publico," habla si Alcalde Lobregat. 

 

Paseo del Mar, uno de los muchos atractivos de Zamboanga para el turista de América Latina, además de su lengua chavacana, a la que en justicia debe llamarse "español filipino".

 

Mas de siete cientos residentes, viejos y jovenes, que ya recivi con el beneficio medical y dental, que yah hace na Pettit Barracks del 8 Octubre. Suportando con este suceso el Rotary Club of Zamboanga City, y maga militar medico del Western Mindanao Command y del Joint Special Operations Task Force Philippines (JSOTF-P) del Estados Unidos.  

Ya servi el programa como libre clinicas de especializacion y consultaciones en pediatria, gynecologia, dermatologia, diabetes, pulmonologia, ophthalmologia, y rheumatologia. Tiene tambien examinaciones del syphilis y HIV, hepatitis B, y servicio de laboratorio, y otras cosas como electrocardiogram (ECG), radiografia (x-ray) y examinaciones de mujeres preñadas (prueba del embarazo). 

UN ELOGIO POR ZAMBOANGA Y ALCALDE LOBREGAT  

Conocido con el Zamboanga no solamente que Ciudad Latina del Asia, o Ciudad de las Flores [del Filipinas], pero tambien como ciudad capital del industria manufactura del sardinas. El mar de Zamboanga conocido porque abundancia este con el sardinas. Por causa con este, ya pensa hace cuatro año pasado mas el Oficina de Turismo y de este Oficial Primer, Señora Sarita Hernandez y Sebastian, el Wow Sardinas. 

Na Wow Sardinas, todo participantes tan come sardinas y galletas, y toma agua-como un merienda libre estaba con el industria del sardinas. Lleno del maga gente el entero Roseller T. Lim Boulevard. 

 

El alcalde Celso Lobregat entrega a Casiano Bucoy su premio 2010, como ganador del concurso de compositores de canciones en chavacano, por su tema "Zamboanga, Zamboanga"

 

 

Participando con el Wow Sardinas el maga representantes del sectores diferentes-del educacion, negocio y financial, militar, industrial, y las compañias de sardinas: Mega Sardines, Columbus Seafoods Corporation, Atlantic Seafoods Corporation, Permex Producers, Universal Canning Corporation, junto con el suporta del compañia de agua, Natures' Spring, y compañia del galletas, Monde Nissin Corporation. 

El Secretario de Turismo Albert Lim mismo ya elogia con Alcalde Celso Lobregat por su programa de turismo, incluido con los todos actividades. Ya anuncia le que el esfuerzo del Alcalde y su administracion para inverter en el desarollo del parque, como el Nuevo Plaza del Pilar, para empujar el campañia del Oficinas de Informacion y Turismo Local que correctar el mal impression acerca del situacion de paz en Zamboanga y entero Mindanao. 

El Alcalde Lobregat ya recibi del un mes pasada es un gran honor que Alcalde Excepcional del todas ciudades en entero Filipinas desde Vice-Presidente del Republica, Jejomar Binay. 

PLAZA DEL PILAR  

Un nuevo infrastructura del Zamboanga el Plaza del Pilar, cerca na Fortaleza del Pilar y Paseo del Mar y Museo Nacional. Este el primer centro commercial para con el maga productos locales en ciudad latina. Mas de cincuenta tiendas hay tan vende comidas de dulcerecuerdos de Zamboanga, candelas y candeleras, simbolos de devociones para con el maga Catolico. 

"The strength of the city is its rich and colorful history and culture," ya proclama el Secretario de Turismo Albert Lim, umentando que el diseño arquitectural (arquitectonico) del plaza tan armonizan con el otro conocido lugar del ciudad. Ya promete tambien el secretario que ayuda ele con el Zamboanga para puede este maneja el desarollo del famoso Isla de Santa Cruz, y rehabilita con el Museo Nacional adentro del Fortaleza del Pilar. Cuando ya inaugura con el Plaza, mismo el Arzobispo Romulo Valles ya dale el bendicion.  

Incluido con el maga visita distinguido o eminente: Congresista Maria Isabelle 'Beng' Climaco (ahora el Deputy Speaker for Mindanao del Camara de Filipinas), el Alcalde Lobregat, Vice Alcalde Cesar Iturralde, Consejales Benjamin Guingona, Reynaldo Candido, Rodolfo Lim, Myra Paz Abubakar y Valderrosa, Percival Ramos, Joefel de las Peñas, Aman Abdurahman Nuño, Lilia Nuño, y Rogelio Valesco Jr. Ya abuya tambien el Comandante (Hefe) del Philippine Air Force estacionado na Edwin Andrews Air Base(EAAB) en Zamboanga, Brig. Gen. Lorenzo Sumicad. 

REGATTA Y MASCOTA DE ZAMBOANGA  

El Regatta de Zamboanga un inovacion original que es un espectaculo lleno de color, porque cientos de vintas de bien bonito diseño tan participa con el unico concurso de valor, potencia, y fuerza. Ciento veinte y cinco operarios de lancha motora ya entra con el competicion y miles de Zamboangueños y turistas yan junto na aplaya para mira el grande suceso anual. Ya explica el Alcalde Lobregat que el vinta -un clase de barca pequeña como canoa- ya queda simbolo cultural del Zamboanga. 

"El mascota es el camisa tradicional del Chavacano incluido el camisa, pañuelo, saya, tapis y el enagua." Este ya explica el un Miss Zamboanga de pasada, Sñra. Icelle Gloria Borja, ahora un miembro del comite del National Commission on Culture and the Arts (NCCA). Ya habla le con el corresponsal del Ares Prensa, este el evidencia del influencia Español con el cultura local particularmente con nuestra traje de Zamboangueña. Hasta este dia, usando siempre las mujeres con el mascota durante ocasiones especiales. La Señora Borja es conocido tambien por su artes, y su muy sabroso "Paella de Zamboanga".  

Cada Fiesta Hermosa, un desfile de modelos del mascota es un atraccion mayor para con todo modistos y diseñadores de moda en Zamboanga. A segun con el Oficial Hefe del Oficina del Informacion del Ciudad de Zamboanga, Sñra. Belen Sheila Covarrubias, el celebracion del Fiesta Hermosa este año es inclusivo del sucesos en culturas y artes, academico, ferias de agricultura y pesqueria, servicio social, juegos y competiciones, y el mas de importante, el celebracion religioso del fiesta de la patrona del Zamboanga, La Virgen del Pilar. 

 

Jóvenes zamboangueños ganadores del certamen "Dancesport" 2010, con el alcalde Lobregat, durante la celebración de la Fiesta del Pilar

 

Estos todos actividades, habla el Alcalde Lobregat, que tan demonstra el patrimonio multicultural del Zamboanga, que ahora simbolo viviendo del herencia del España con el Filipinas. 

Incluido na otros sucesos el concurso del conversando en Chavacano del todo instituciones technico-vocacional en Mein College, un exhibicion del obras de artes ('Zamboanga, Zamboanga') en Galeria del Peninsula y de Archipelago del Ateneo De Zamboanga University, y del pintadas ('Solamente Zamboanga') del pintores locales en Garden Orchid Hotel. Ya hace tambien actividades para con el maga animales, especialmente perros favoritos del residentes. El Congresista del Segundo Distrito, Erico Basilio Fabian, yan padrino con el juego, Golpe-Golpe del Barangay. 

PUNTO CULMINANTE: FIESTA LA VIRGEN DEL PILAR 

Mucho quien ta espera con el parada de baile, un competicion del maga escuela de Zamboanga. Ganando este año el Zamboanga City High School-Main Campus, Zamboanga City High School-West Campus, y el Don Pablo Lorenzo Memorial High School. 

Mas de un mil estudiante ya participa con el maga bailes de colores, que semejante con el maga bailes del jovenes en camino de Rio de Janeiro en Brazil o del Santa Marta en Colombia si tiene fiesta. Este año, ya gana el maga carrozas del Western Mindanao State University, del Bureau of Jail Management and Penology, y del Zamboanga Cycling Association.  

El dia de 12 Octubre es el punto culminante principal del Fiesta Hermosa, que este el Fiesta del Nuestra Señora la Virgen del Pilar, la santa patrona del Zamboanga. El centro del actividades este dia el Fortaleza, que conocido tambien con su nombre Español, Real Fuerza de Nuestra Señora del Pilar de Zaragoza, y su nombre ingles, Fort Pilar. El Fort Pilar es un fortaleza del militar durante del siglo decimoseptimo que ya construi el gobierno colonial del España. Este dia, el Fort Pilar es famoso como el santuario del Virgen con quien creando el Zamboangueños que ta hace milagro y ta contesta rezos aunque bien dificil o cerca de imposible. 

El rosario del alas 4 de madrugada, misa desde alas 6 hasta alas 10 de dia, el procesion tradicional en tarde que principia desde Metropolitan Cathedral of the Immaculate Conception hasta na santuario, el ultimo rezo del nueve dia de novena, y el Misa Pontifical con Arzobispo Valles y otros padres-todos estos maga sucesos del mismo dia del Fiesta en Zamboanga. El Secretario del Educacion, Bro. Armin Luistro, ya veni na Zamboanga como invitado distinguido del Ciudad. 

Manada sucesos que no hay puede mentar y todos estos un grande parte cada año del celebracion. Y el invitacion del todo Zamboangueños afuera del pais con todos ciudadanos en Sudamerica, "Vamos a Zamboanga!" (aresprensa.com).

--------

Créditos fotográficos: Frencie Carreón, skycraper.

0.0
Actualizado: -/-
Articulos relacionados: LA "FIESTA HERMOSA" DE ZAMBOANGA 2010 AVANZAN ESTUDIOS PARA HERMANAR A ZAMBOANGA
LENGUA ESPAÑOLA EN FILIPINAS

Visitas acumuladas para esta nota: 2188

¡SÍGANOS Y COMENTE!